Ruija forlaaki anttaa ulos toisen Linus-kirjan

Linus laittaa tomaattivellin -kirjan lanseerathaan Tromssan biblioteekissa 16.1.2020 klo 13.00. Paikala oon Ruija foorlaaki, Kainun institutti ja kirjailiija Anna-Kaisa Räisänen.

Linus laittaa tomaattivellin -kirjassa lukkiija saapi taas uuesti kohatella Linuksen ja hänen ystävän Karhu Rievun. Het aijothaan laittaat ruokkaa papan kans. Kaikki ei mene niin hyvin ko plaana oli, mutta Linus, Karhu Riepu ja pappa keitethään lopulta hyvän vellin.

Linus laittaa tomaattivellin oon kirja siitä, kunka elämä ei tasan mene plaanoitten jälkhiin. Joskus tullee pikku tingat, mutta kaikkiin vaikkeukshiin löyttyy joku ratkaisu.

Anna-Kaisa Räisänen kirjoittaa Linus-kirjasarjassa lasten tavalisista päivistä ja pikku tapattumista lasten elämässä.

Kuvittaaja Christina Gjertsen oon priimustannu somat kuvat kirhjaan. Net viejhään lapsen Linuksen mailmhaan.

 

Kirjailiijasta

Anna-Kaisa Räisänen oon syntyny Oulussa Pohjais-Suomessa. Hän oon työtely kväänin kielen kans vuojesta 2007. Pohjais-Norjassa oon hän asunu vuojesta 2014 ja työtely kväänin kielen elästyttämisen kans Kainun institutissa. Hän oon kirjoittannu lastenlaulutekstiitä lastentarastyöhön ennen ko debyteerasi lastenkirjailiijana Linus kaottaa Karhu Rievun –kirjala vuona 2019.

Kirjan saattaa ostaat Meän krampuohista.