Facebookin käytetyimät sanat kväänin eli kainun kielelä

Facebookin käytetyimät sanat ja toiminot oon nyt käänetty kväänin eli kainun kielele. Tämä oon ollu maholista vähemistökielitten käänösprošektin avula. Monet vähemistökielet, niin ko kväänin kieli, ei kuulu niitten 100 viralisen Facebook-kielen joukkhoon.

Jotta voit käyttää Facebookia kväänin kielelä, sie tarvittet vasituisen skriptin joka tekkee muutoksia nettisivula. Skriptin asenat netinlukijhaan ja se vaihettaa Facebookin norjan- eli ruijankieliset sanat kväänin kielele.

Kainun institutti – Kvensk institutt oon kääntäny 200 tärkeintä sannaa ja toimintoa tätä skriptiä varten. Sanat oon käänetty kahele eri variantile: Kvääni/Kainu (öystä) ja Kvääni/Kainu (vesta). Öystä-variantti oon likempänä Varengin dialektejä ja vesta-variantti likempänä Porsangin ja Raisin dialektejä. Sie saatat valita kumpaa varianttia käytät. Pääkielenä oon Norsk (bokmål).

Käänösfiilin asenus

Tästä löyät neuvot kunka asenat skriptin Chrome- ja Firefox-netinlukijhaan. Skripti toimii parhaiten Chrome-netinlukijassa. Chromen asenat helposti, ja sitä oon nopea ja helppo käyttää.

Chrome
Valitte tältä sivulta sen variantin jonka haluat asentaa: https://github.com/kscanne/secwepemc-facebook/blob/master/INSTALL.textile
Valitte ensin Chrome-linkin jotta pääset sivule Chrome Web Store. Klikkaa sitte sinistä ”Legg til chrome”- knappia, mikä oon ylhäälä oikealla.

Firefox
Greasemonkey-skripti oon netinlukijan lisäosa, joka tekkee muutoksia nettisivuile ennen ko net näkyvä käyttäjälle. Skriptin asenat klikkaamalla tätä fiiliä: https://addons.mozilla.org/en-US/firefox/addon/greasemonkey/

Valitte tältä sivulta sen variantin jonka haluat asentaa: https://github.com/kscanne/secwepemc-facebook/blob/master/INSTALL.textile
Asena skriptin ja valitte sitte Facebookin pääkieleksi tämän: Norsk (bokmål). Net sanat, joita ei ole vielä käänetty kvääniksi, näkyvä silloin norjaksi eli ruijaksi.

Käänöksiä jo yli 30 vähemistökielelä

Kanadalainen Neskie Manuel aloitti tämän prošektin siksi ko hän halusi kääntää Facebookin hänen omale First Nations-kielele, Secwepemctsínille. Neskie Manuel kuoli viimi vuona, ja professori Kevin Scannell halusi kunnioittaa hänen muistoa ja jatkoi prošektia. Hän muutti skriptiä niin, ette se toimii kaikila kielilä, ja hän oon tehny skriptin kans kväänin kieliväršuunia varten.

Facebookin käyttäminen kväänin kielelä voi antaa monipuolisen kielikokemuksen, ja samala opit monta uutta sannaa.

Nyt oon jo yli kolmekymmentä vähemistökieltä saanheet oman käänöksen. Monet näistä kielistä oon uhattuja kieliä: https://github.com/kscanne/secwepemc-facebook/blob/master/LINGUAS.

Met lähätämmä suuren kiitoksen Kevin Scannellile Amerikkhaan, ko hän oon työtely  vähemistökielitten ja uusien medioitten etheen.

Ota kontaktin Facebookissa: www.facebook.com/Kvenskinstitutt Facebookissa tahtuu koko aijan muutoksia. Sen tähen jokku käänökset saattava muutamisti näkyä tyhä ruijaksi eli norjaksi.

Muista uuistaa nettilukiijan filiitten asenuksen jälkeen!  Kiitoksia!