Monta kohattelluu Kielitingan kokkouksessa

Kielitingala oli kokkous Oslossa. Kainun institutti järjesti samala epäviralisen kokkouksen, jossa Kieltinka, FAD, KUD, KD ja Språkrådet kohđatelthiin. Kokkouksessa oli Kainun kielitingala mahđolisuus praattiit niitten departtimenttiin kans, jokka oon myötä Kielitingan kielityössä.

Kokkouksessa oli mahđolisuus jakkaat tiettoo meiđän kielityöstä, eli miksi met olema valinheet tehđä niin ko met tehemä ja kunka met sen tehemä. Met muistelima institutin suunitelmista kielen revitaliseeramisen etheen, ja kunka met luoma infrastruktuurii kväänin kielele. Kielitinka kiittää departtimenttiitä hyvästä kokkouksesta!

Eteläsaamen kielityö fokuksessa tällä kerttaa

Kielitinka opastu kans eteläsaamen kielityöhön. Lisa Baal ja Elin Fjellheim muistelthiin omasta työstä. Tämä kokkous oon jatkoo dialogikokkoukselle, minkä Kielitinka järjesti Tromssassa ennen jouluu. Kokkouksessa käsitelthiin sananrakenusta, sanapuohii ja terminologiaa.

Kielitinka oon kokkoontunnu eri kielimiljöin työntekkiijöin kans, niin ko Lars Vikørin (ruija), Hannu Töyrylän (meänkieli) og Rolf Olsenin (pohjaissaami) kans. Nämät kohtaamiset annethaan meile perspektiivii työssä ja erilaisten probleemiin kans.