Suomalais-ugrilaista yhtheistyötä Inkerinmaala

Kainun institutin prošektijohtaja Kaisa Maliniemi oon yhessä Ivar Johnsenin (Ruijan Kveeniliitto) kanssa ollu myötä kokkouksissa, joita järjestethiin NGO-prošektin yhtheyessä. Prošektissa freistathaan vahvistaa Venäjän inkerinsuomalaisten ja vatjalaisten kieltä ja kulttuuria eriliikaisesti kulttuuriaktiviteetitten avula.

Kokkoukset järjestethiin Pietarissa 2.-4. oktooperikuuta, ja järjestäjänä oli Inkerin kulttuuriseura.

– Matkala met opastuima inkerinsuomalaisten asuma-aloihin ja kielen tilhaan Venäjällä. Huonoin tilane oon vatjalaisila. Heilä ei ole ommaa kirjakieltä ja monikhaan ei enhään puhu kieltä. Vatjan kieli oon likelä eestin kieltä, muistelee Kaisa Maliniemi. Vatja oon äärimäisen uhattu kieli.

Prošektissa oon myötä osalistujia Suomesta, Venäjältä, Eestistä ja Norjasta.

Juunikuussa 2013 het tuleva Kainun institutthiin opastumhaan kväänin eli kainun kielheen ja kulttuurhiin.

Luje enämen Inkerinmaasta täältä: http://fi.wikipedia.org/wiki/Inkeri http://no.wikipedia.org/wiki/Ingermanland

Inkerisuomalaisista saatat lukea enämen täältä: http://www.inkeri.spb.ru/

Marian kirkko oon inkerinsuomalaisten evankelis-luterilainen kirkko Pietarissa. Se oon inkerinsuomalaisten kokkointumispaikka Venäjällä. Prošektin kokkoukset piethiin täälä.