Egil Sundelin oon uuen kielitingan johtaaja

Uusi kväänin kielitinka oon alkanu työhön ja se aikkoo fokuseerata terminologiin eistämisheen ja kommunikasjuunhiin.

Kväänin kielitingan valithaan neljeksi vuoeksi kerrala. Kuka hyvänsä saattaa ehottaat kielitinkhaan jäseniitä, mutta Kainun institutin styyri päättää kekkä oon uuet jäsenet. Kielitinka hunteeraa kieliassiin pääle ja het päätethään ylheisten kväänin kielen normiista. Het oon kans myötä ko kehitethään ja laitethaan uutta terminologiita ja vaikka nimmii organisasjuuniile.

Vaikka korona oon rajoittanu toimii, niin uuen kväänin kielitingan oon kuiten saatu valituksi. Sillä oon ollu jo kaksi mööttii. 23. aprillikuuta 2020 piethiin möötin missä kielitinka konstitueerathiin, ja sen jäsenet oon:

Johtaaja: Egil Sundelin, Alta
Varajohtaaja: Katriina Pedersen, Annijoki/Naavuono
Jäsen: Kyrre Isaksen, Lemmijoki
Jäsen: Nora Ollila, Tromssa
Jäsen: Eira Söderholm
Jäsen: Oddgeir Johansen, Pyssyjoki
Jäsen Arne Osima, Pykeijä/Tromssa
Varajäsen: Alf Steinar Børresen, Teno
Varajäsen: Geir Johan Nilsen, Vestre Jakobselv/Uslu
Varajäsen: Bjørnar Josefsen, Pyssyjoki

Kielitinka oon iloinen ko se oon nyt päässy työtelemhään. Möötissä 5. juunikuuta se päätti olla myötä matematikkiprosektissa Hilja Hurun (UiT Norjan arktinen universiteetti) ja Naavuonon kielisentterin kans. Prosekti jatkaa Hilja Hurun ja Anita Simensenin tutkimusta, het oon tutkinheet ette kunka matematikin ja kielten oppimisen saatethaan yhistäät.

Toinen tärkkee assii minkä kielitinka halluu prioriteerata oon kommunikasjuuni. Se halluu anttaat ulos tiettoo siitä kunka se mennee kväänin kielen kans ja kans kielitingan omista päätöksistä. Sie saatat kuorata kielitingan työtelyy Facebookissa kielitingan omala laiala ”Kväänin kielitinka – Kvensk språkting”, Kainun institutin Facebook-laiala ja kans Kainun institutin nettilaiala www.kvenskinstitutt.no.

Enämen tiettoo:
Eposti: post@kvenskinstitutt.no
Telefuuni: +47 78 46 10 10

Kainun institutti – Kvensk institutt oon kväänin kielen ja kulttuurin kansalinen sentteri.
Kainun institutin perustethiin vuona 2005 ja siitä asti se oon työtely kväänin kielen ja kulttuurin kehittämisen, dokumenteeraamisen ja tieon jakamisen ympäri ja kväänin kielen käyttämisen eistämiseksi yhtheiskunnassa.