Uutissii lapsile kvääniksi

Aftenposten Junior kirjoitti varhemin tänä vuona Villenistä. Hän oppii kväänin kieltä ja toivoo, ette Aftenposten, NRK ja kans muut nostettais kväänin kielen paremin framile. Nyt oon hänelä ja kaikila muilaki maholisuus lukkeet kvääninkielissii artikkeliita Aftenposten Juniorissa.

Kainun institutti ja Aftenposten oon alkanheet prosektin, jossa institutti käänttää Aftenposten Juniorile tekstii kolmen vuoen aijan. Se oon maholista lukkeet ainaki yhen uuen artikkelin joka viikko.

”Se oon soma, ette lapset ja nuoret saavat lukkeet kvääniksi teemoista mikkä oon heitä likelä,” sannoo istitutin johtaaja Hilde Skanke. Ja hän sannoo vielä, ”se kuurttoo kans kouluopetusta, ja anttaa kans uutta motivasuunii.”

Institutin faakieesvastaava Anna-Kaisa Räisänen meinaa, ette se oon tärkkee anttaat lapsile ja nuorile uuet kieliareenat. Tekstit käänethään samale variantile, mikä oon kväänin kielen oppikirjoissa. Anna-Kaisa työtelee yhessä kielityöteliijöitten Merethe Eidstøn, Mari Keräsen ja Pirjo Paavalniemen kans tässä prosektissa.

Luje Villenistä kvääniksi täälä: Kjemper for språket sitt – Aftenposten Junior skole